Rev 11 | MMX | STEP | La laangelo ga raba ia mi lakdak soksoxovo, la ni ga lok tia, “Unat pas la una soxovo loogu laplavang at ne Moroa la loxonin laplavang keneng teren, la una us bok nedi di lotu go.

Revelation of John 11

Moroa Ga Riki Legepu Radi Xusu Duna Vavang

1 La laangelo ga raba ia mi lakdak soksoxovo, la ni ga lok tia, “Unat pas la una soxovo loogu laplavang at ne Moroa la loxonin laplavang keneng teren, la una us bok nedi di lotu go. 2 Ketla nemen uta soxovo lemelua ik lok kangkan mo loogu laplavang, mila nom lemelua ik lok ti limixin kopmen di me Judaia. La nedi dibat pas axangka lemenemen kaala Jerusalem at lavanuet sangaun mi legepura leven gaaling. 3 La ap mo levenaleng aba riki aonon luradi vapaase rak mi lololos kusu duna vavang mi levelinga rak ap mo legesa abin sangsangaun kobot mi legepu sangaun kobot mi lavanna sangaun aleng (1,260); la duba siga mun lengkontamon gurusek at limixin dik saxaanu.” 4 Mo luradi vapaase, nedu legepu una olip la nedu bok lubabao di tu gagas to melamgo at ne Moroa, ni lo Moroa at na lavatbung menemen. 5 La do tara na lok tong i xusu na sep du, laxao ba soli su boro at lungusno du, la ba rin asonao lavamunepen atdu; la at na mun langas do tara na lok tong i xusu na sep du, neni naba met kerepmo. 6 Dunaba ruuna lololos kusu ri ru pe larakabu la noxo vot ap mo levenaleng do nedu dunaba vavang teren, la dunaba ruuna bok lololos kusu duna ba gili levendan ti lada, la dunaba ruuna bok lololos tip sev amisik limixin at na lavatbung menemen mi levenasen songsongot axap, mo do duba vara i do duna lox amisix i.

7 Do duna lox axap mo lugugu ri vaase asu levelinga at ne Moroa, lara lavatpanga sio mi lavanuet kangkedek teren ba vasu ap mo lemeroon la ba esep mi mo luradi at ne Moroa la naba ranga alis du la na sev amet du. 8 La lubantuxu atdu nabak midi ro at langas ap mo lemenemen silok, ap mo mun loxot Leeme Silok atdu ga met at laxaba ve. Luasen poovo ap mo lemenemen ne Sodom la ne Isip. 9 La limixin boro at levengkot axap, la larabibinat, la levempapaase, la levenbantuxu diba reven lubantuxu atdu at lavantun mi loxon atat aleng la di noxo mulus kusu dina lok li lubantuxu atdu at lamaaut. 10 La limixin axap at lavatbung menemen diba momo aleng mumu lanmet atdu. Diba lok larapeluxa silok la diba etaba ela mi leventamtaba atdi. Lavasuun teren do na luradi vapaase duba lok buaang levempanga songsongot mavana at limixin.

11 Ketla melemu at lavantun mi loxon atat levenaleng, Moroa ba raba mamas du, la duba xatu kaxat, la nedi limixin diba ven du, diba marat aleng. 12 La na luradi vapaase duba ronga lara na vaase ridu boro vana at laxalibet la ba lok, “Ude numu vana.” La duba urut uto vana at laxalibet keneng at loxontakabu, la limixin munepen midu mo diba tu la diba reven du.

13 La ap mo mun loxonaleng langsangan langne ba vot, la lenep i sepsev asangaun ap mo laraugu xeneng at lemenemen silok ba rem tereve axap; la lavanuti larabin sangsangaun kobot (7000) limixin diba met at nom langne, la nedi limixin diba roo suu ap mo langne diba marat aleng tinotno la diba emi asu mi ne Moroa no vana at laxalibet.

14 La nom lumumuat sepsev agepura na nga ira xap, ketla lumumuat sepsev avantun move la i auret do na vot.

Laangelo Sepsev Avanuti

15 La laangelo sepsev avanuti ga mas luru ren, la aga ronga laxaka linga silok at lentaba to vana at laxalibet ga lok keretna,

‘Amo nga Leeme Silok atdik eburu mi Lanarong teren du ru ka loklok tatao at na lavatbung menemen. La nedu dunaba lok tatao amisik la kopmen taxavaxap teren.’ ^a

16 La nedi legepu sangaun mi lavanuet loxongkulao amgomgo mo digat kis at levengkonin orong atdi to melamgo at ne Moroa, diga xis tiktikbu mi lempatgulom atdi la diga lotu parap ne Moroa. 17 Diga lok keretna,

‘Ma tong avukat tu, Leeme Silok, ne Moroa i lolos aleng, mo ga nemen gano la i nemen bok lingina, mila ura gu asu vam mi langsangan lololos taram la ura ru ka vam loklok tatao ram at na lavatbung menemen. 18 Nedi lavamolon diga musak teng tino, ketla laaleng ira vot pam kusu una lox asuusu lebelemamao ram, la uba lok li limixin digara met pam at lavapaase. Ni laaleng bok kusu uba raba luunun avukat ti lavaeme vapaase alii ram, nedi lavasaxaruki ram la tinedi limixin nuunu la nedi bok dik lok ngangao at laasen taram; nedi limixin gamasa la nedi bok di ruuna laasen silok. La laaleng ira vot pam kusu uba sele utut kepe nedi limixin diga lok kapmek lixitkis nunuan at na lavatbung menemen.’ ^b

19 Melemu at na, loogu laplavang at ne Moroa ga rem suang to vana at laxalibet, la limixin diga ven lobokis kaala, mo ga lok katling lekabus maxat at ne Moroa. La limixin diga ven lavanga ga mam etitit, la diga ronga leretepaavat gak lox epasum la diga suma lavarangne silok la lengkos uat gan bun aleng ga subu.